15 نصيحة للتوفيق بين الفيسبوك والثانوية العامة والمذاكرة - Facebook and Study

يعتقد الكثيرون ان الثانوية العامة والفيسبوك او مواقع التواصل الاجتماعي عموما اعداء.
نعم يضيع الفيسبوك الكثير من الوقت ! نعم الفيسبوك قد يشغلك عن المذاكرة !
ولكن هل الحل فى اغلاق حساب الفيسبوك حتى تنتهي من هذه السنه ؟ هل يمكن التوفيق بين الفيسبوك والمذاكرة ؟
نعم يمكن وهنا تجد الحل الذى هو افضل من اغلاق حساب الفيسبوك ^_^


السلام عليكم ورحمة الله وبركاته
بسم الله الرحمن الرحيم
والصلاة والسلام على سيدنا محمد النبى الامي الامين
ثم اما بعد :

15 نصيحة للتوفيق بين الفيسبوك والثانوية العامة والمذاكرة - Facebook and Study


طيب .. نبدا 
عشان توفق بين مذاكرتك والفيسبوك انت محتاج تحدد انت بتستخدم الفيسبوك ليه ؟

دي معظم استخدامات مواقع التواصل الاجتماعي والفيسبوك بالنسبه للمصريين :

- ناس بتتابع الاخبار فقط الخاص بعمل او مجال معين او دراسة .
- ناس بتتواصل مع العائلة والاصدقاء فى الامور المهمه فقط .
- ناس بتعمل من خلال الفيسبوك على الصفحات او الترويج  .
- ناس بتلعب وتلهو ووبتتكلم مع فلان وفلانه وبتضيع وقت :D ( ده الاغلب ^^ ) 
- ناس  بتستخدم الفيسبوك فى الشات بس مع الاصدقاء او العيله وميهمهاش الفيسبوك في حد ذاته .
- ناس بتستخدم الفيسبوك للتواصل مع شخص معين فقط ( شخص او اثنين على الاكثر )
- ناس بتستخدم الفيسبوك للحصول على متابعين وتفجيرات واشياء عجيبه هههههه .

هذه هى اغلب استعمالاتنا للفيسبوك فيجب عليك اولا تحديد نوع استخدامك .

دلوقتى بقا :  كيف توفق بين استخدامك للفيسبوك ومذاكرتك ؟
( الامر كله يعتمد علي قوة ارادتك وهل انت بالفعل عاوز تذاكر ولا كلام وخلاص )


1 - لو انت بتستخدم استخدام خفيف للامور المهمه ومتابعة الاخبار والعمل الخفيف مفيش مانع من الفيس واستخدمه عادي مع الحرص على باقي الخطوات .

2 - لو عندك بديل للفيس تقدر توصل بيه للاستخدام اللى انت عاوزه .. يفضل استخدامه لان الفيس بيشتت عموما وبيسحبك فى مواضيع كتير فلو انت مثلا غرضك من الفيس انت تكلم حد معين فبلاش الفيس شوف وسيلة تانيه افضل .

3 - امشى مع الفيسبوك بنظام ( لكل مجتهد نصيب ) ... ان ذاكرت استخدمه ولو مذاكرتش فاحرم نفسك منه ( طبعا انت لازم تسيطر على نفسك )

4 - خلي الفيسبوك فى وقت محدد من اليوم ولمدة معينه ولهدف معين : يعنى مثلا انت هتذاكر الصبح ولو ذاكرت هتقعد على الفيس الساعه كذا ولمدة كذا عشان تعمل كذا .

5 - متضيقش على نفسك وتقول هستخدم الفيسبوك 10 دقايق بس وفى نفس الوقت متوسعهاش خالص وتقول هستخدمه اكتر من 3 ساعات.

6 - لو غرض استخدامك للفيسبوك هوانك تكلم شخص معين فلازم تعرفه اللى هتعمله ولازم تقوله عن وضعك الدراسي وازاى ناوي تنظم وقتك وجلوسك على الفيسبوك بحيث يكون الشخص ده مساعد لك ويعينك ويشجعك ويسالك اذا كنت ذاكرت ولا لا .

7 - لو الشخص ده من الاشخاص اللي هيحبطوك ويجعلوك تتكلم معاهم طول اليوم ومش مهتمين بمصلحتك فمتقولوش على تنظيم يومك قوله بس انك عندك ظروف ومش هتقدر تفتح غير فى الوقت ده عشان برده يبقا فاهم .

8 - لو انت متعود تستخدم الفيس بشكل كبير حاول تقلل من الاستخدام بشكل تدريجي ومتضغطش على نفسك مره واحده عشان ممكن تحصل نتائج عكسيه .

9 - لو انت خلاص حددت نظامك وقولت هستخدم الفيس فى الميعاد كذا ولمدة كذا عشان اعمل كذا وبعدها انحرفت انت عن النظام ده لازم تعاقب نفسك بانك تحرم نفسك من انك تقعد على الفيس اليوم اللى بعده او انك تقلل من المدة مثلا .

10 - الميعاد اللى انت حددته مش مقدس : يعنى عادي ممكن تغيره او تخليه بدرى شويه او ممكن تقعد اكتر شويه بس حاجه بسيطه وطبعا ده كله فى حالة انك انهيت كل اللى عليك من المذاكرة

11 - متاخدش قرار وتقفل حساب الفيسبوك لو انت حاسس انك مش هتقدر تستمر على الوضع ده ... الترفيه مهم برده زي الدراسه

12 - طيب لو جيه وقت الفيسبوك وموجدتش حاجه تعملها عليه : متستمرش علي الفيسبوك ، سيبه وشوف حاجه تانيه تكون ترفيه برده بالنسبالك . متخليش الفيسبوك يسحبك من حوار لحوار ... انت فاتح الفيسبوك لهدف معين او عشان تكلم شخص معين . لو الهدف اختفي ... الفيسبوك يختفي معاه .

13 - لو انت بتستخدم الفيسبوك بشكل عشوائي وبدون هدف ومفيش حاجه مهمه عليه فالافضل انك تبعد عن الفيسبوك بشكل تدريجي وتبعد عنه خالص فى الاخر .

13 - خليك واثق فى نفسك واعرف ان الفيسبوك ده مجرد اداة للتواصل عشان الامور المهمه والاشخاص المهمين .. تنظيم الوقت سهل ويومك يتسع لحاجات كتير اوي .

14 - وانت بتذاكر او خارج وقت الفيسبوك حاول تطلع الفيسبوك من دماغك ... وخلي كل اللى فى دماغك انك هتذاكر دلوقتى عشان تفتح فيس بعدين ... ( نفس نظام الاجازة او المرتبات فى الشغل انت بتعمل دلوقتى عشان تحصل على مرتب او اجازة بعدين ) فمتركزش غير فى شغلك اللى انت بتعمله دلوقتى وسيب الفيس لوقته ... وكذلك وانت قاعد على الفيس اعرف ان ده وقت رفاهيتك فمتتعبش دماغك بحاجه تانيه .

15 - حاول تنظم حياتك ككل وتحدد اولوياتك بشكل سليم ( دينك ومستقبلك واهلك والاشخاص اللى بتحبهم ) .


دول كانو 15 نصيحه عشان تقدر توفق بين دراستك والفيسبوك او رفاهيتك بمعنى اصح 
اهم حاجه فى الموضوع كله هو ارادتك انت وخليك دايما فاكر وحاطط مستقبلك ادامك 
الموضوع بسيط محتاج بس شوية تنظيم وتعاون من اللى حواليك وتعاون بين عقلك وقلبك وجسدك ... وادعي ربك ^^

شير بقا من الازرار اللي هتلاقيها تحت الموضوع على طول عشان الكل يستفيد ^^

نرجوا ان تكون قد استفدت من هذا الموضوع وان تفيد غيرك بنشر هذا الموضوع ، كما يمكنك ترك آراءك وتعليقاتك بالاسفل ، وشكرا :)

جيل تاني - Geel Tany للتعلم عن بعد , كمبيوتر , انترنت , بلوجر , فوتوشوب , فيس بوك , جوجل , اسلاميات , برامج , حل مشاكل , تقنيه , تكنولوجيا , تعليم , قراءه ...... والمزيد والكثير 

تابعونا ........ :)

شارك الموضوع

مواضيع ذات صلة

نشكركم ^_^